Azərbaycan Respublikası Təhsil, Rabitə və İnformasiya Texnologiyaları nazirlikləri, Microsoft Azərbaycan şirkətinin birgə təşkilatçılığı, HP, Ultra və Bestcomp Groupun dəstəyi ilə gerçəkləşən tədbirdə «Xalq kompüteri» layihəsinin əsas mərhələsinin başlanması haqda razılaşma sənədi imzalanıb. Forumda ali məktəblərin rektorları, Təhsil, Rabitə və İnformasiya Texnologiyaları nazirliklərinin müvafiq şöbələrinin, müxtəlif şirkət və təşkilatların rəhbərləri, beynəlxalq qurumların nümayəndələri, müəllimlər və KİV təmsilçiləri iştirak ediblər. Rabitə və İnformasiya Texnologiyaları Nazirliyi İnformasiya cəmiyyətinin inkişafı şöbəsinin müdiri Rüfət Gülməmmədov «Xalq kompüteri» layihəsi ilə bağlı fikirlərini diqqətə çatdırıb. HP-Azərbaycan şirkətinin nümayəndəsi Rüfət Hacıəlibəyov, Bestcomp Group şirkətinin direktoru Rauf Həsənov və Ultra şirkətinin direktoru Tahir Mirkişili layihə çərçivəsində görülən işlər və həyata keçirilən tədbirlər barədə söz açıblar. Microsoft Azərbaycan şirkəti tərəfindən «Microsoft şirkəti yaxın gələcəkdə bizi necə görür» adlı videoçarx nümayiş etdirilib. Qonaqları salamlayan təhsil naziri Misir Mərdanov təxminən bir il bundan əvvəl başlanmış layihənin nəticələri barədə məlumat verib, ötən dövr ərzində 8 minə yaxın orta məktəb müəlliminin bu layihədə iştirak etdiyini vurğulayıb. Bu işdə əməyi olanların hamısına təşəkkürünü bildirən təhsil naziri həyatımızı kompütersiz təsəvvür etməyin mümkün olmadığını vurğulayıb. On il əvvəl Azərbaycanda hər 1046 şagirdə 1 kompüter düşdüyü halda, bu gün orta hesabla hər 20 şagirdə 1 kompüter düşdüyünü nəzərə çatdıran Misir Mərdanov bütün bu uğurların Azərbaycan Respublikasının Prezidenti İlham Əliyevin dəstəyi və qayğısı sayəsində mümkün olduğunu bildirib. Təhsil Nazirliyi ilə Rabitə və İnformasiya Texnologiyaları Nazirliyi arasında mövcud olan səmərəli əməkdaşlığa diqqət çəkən nazir artıq orta məktəb müəllimləri ilə yanaşı, ali məktəb müəllimləri və tələbələrin də bu layihədən yararlana biləcəklərini qeyd edib. Azərbaycan müəllimlərinin müasir texnologiyalara tədricən daha geniş yer verdiyini konkret faktlarla əsaslandıran təhsil naziri məktəblərdə elektron tədris resurslarından istifadə edilməsinin üstün cəhətlərinə toxunub, gənclərin və uşaqların bu sahəyə daha çox maraq göstərməsini müsbət hal kimi səciyyələndirib. Müvafiq sahədə monitorinq aparan beynəlxalq təşkilatların reytinq cədvəlinə əsasən Azərbaycanın təhsil sistemində İKT-nin tətbiqinin Şərqi Avropa səviyyəsini keçdiyini bildirən rabitə və informasiya texnologiyaları naziri Əli Abbasov bu inkişafın son illər daha geniş vüsət aldığını vurğulayıb. Azərbaycanın təhsil sistemində yüksək texnologiyaların tətbiqinin təhsilin keyfiyyətinə göstərdiyi müsbət təsirdən söz açan Əli Abbasov ölkəmizdə İKT-nin prioritet sahə kimi qəbul olunması, müvafiq dövlət proqramlarının uğurla həyata keçirilməsi istiqamətində aparılan işlər barədə də fikirlərini bildirib.

08/07/2015 16:52

Qonaqları səmimi salamlayan Misir Mərdanov onları Təhsil Nazirliyində görməkdən məmnunluğunu ifadə edib. Fransa ilə Azərbaycan arasında mövcud əlaqələrin son illər daha da inkişaf etdiyini və bu əlaqələrin tarixini diqqətə çatdıran nazir bildirib ki, hazırda qeyd olunan ölkənin ali məktəblərində təhsil alan azərbaycanlı gənclərin sayı çoxalıb. Nazir Fransa universitetləri ilə qurulan sıx əməkdaşlıqdan, “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” nın təsdiqindən sonra əlaqələrin daha da inkişafına əlverişli şərait yaranmasından, bu ölkənin KNOUS təşkilatı ilə imzalanan müqavilədən də söz açıb. Nazir həmçinin 40-a yaxın azərbaycanlı gəncin hazırda Fransanın universitetlərində təhsil aldığından bəhs edib. Görüşdə Misir Mərdanov Fransa universitetləri ilə əlaqələrin genişləndirilməsi, ölkəmizin orta məktəblərində fransız dilinin xarici dil kimi tədrisinin yaxşılaşdırılması ilə bağlı təkliflərini irəli sürüb. Paris Universitetlər İttifaqının Baş katibi Gilbert Bereziat səmimi qəbul üçün nazirə təşəkkür edib. Rəhbərlik etdiyi təşkilat və təmsil olunduğu universitet barədə məlumat verən qonaq öz çıxışında səmərəli əməkdaşlığın qurulması üzrə məsələlərə də toxunub. Sonra cənab Bereziat kənd təsərrüfatı və texniki ixtisaslar üzrə tələbə seçimi, təbiət elmləri və tibb sahəsində əlaqələrin qurulması, eləcə də ölkəmizdə fəaliyyət göstərən Fransız dili Tədrisi Mərkəzində müəllimlərin sayının artırılmasından da söz açıb. Səmimi və qarşılıqlı anlaşma şəraitində keçən görüşdə tələbə mübadiləsinin aparılması, müxtəlif mövzular əhatə olunmaqla beynəlxalq elmi konfransların keçirilməsi və ikitərəfli təhsil əlaqələrinin qurulması məsələləri də müzakirə olunub.

08/07/2015 16:52

Təhsildə korrupsiyaya qarşı mübarizəni fəaliyyətinin prioritet istiqamətlərindən biri hesab edən Təhsil Nazirliyinin Korrupsiyaya Qarşı Mübarizə üzrə İşçi Qrupunun üzvü olan Korrupsiyaya Qarşı Mübarizə Fondunun hazırladığı layihə şagirdlərə müvafiq biliklər verməklə yanaşı, onlarda korrupsiya hallarından qaçmağa imkan yaradan ünsiyyət bacarıqlarını inkişaf etdirmək və korrupsiyaya qarşı mənfi münasibət formalaşdırmaq baxımından da mühüm təsirə malikdir. Bu layihənin məqsədi şagirdləri mənəvi-əxlaqi dəyərlərimizi zədələyən korrupsiya problemi ilə tanış etməyə, azərbaycanlı ailəsində və təhsil müəssisələrində korrupsiyaya qarşı barışmaz münasibət formalaşdırmağa yönəlib. İlk dərslər Bakının Nəsimi rayonundakı 8 saylı orta məktəbdə həftədə bir dəfə olmaqla 4 dərs keçirilib. Dərslərdə məktəbin X-XI sinif şagirdləri iştirak ediblər. Dərslərin gedişi bir daha deməyə əsas verir ki, yeniyetmələr korrupsiya və rüşvətə etiraz edir, onlarda korrupsiyaya qarşı mübarizə aparmaq əzmi formalaşmağa başlayır. Şagirdlərə antikorrupsion maarifləndirmə vəsaitləri, o cümlədən Fondun kitabça şəklində nəşr etdirdiyi “Şəffaflığın Artırılması və Korrupsiyaya Qarşı Mübarizə üzrə Milli Strategiya” təqdim edilib. Onu da qeyd edək ki, Korrupsiyaya Qarşı Mübarizə Fondu yeni dərs ilindən başlayaraq orta məktəblərdə antikorrupsion maarifləndirmə dərslərinin keçirilməsini davam etdirməyə qərar verib. Bundan əlavə, Fond kitabça şəklində nəşr etdirdiyi “Şəffaflığın Artırılması və Korrupsiyaya Qarşı Mübarizə üzrə Milli Strategiya”nı yay imtahan sessiyası dövründə ali təhsil müəssisələrində kompaniya şəklində yaymağı nəzərdə tutub.

08/07/2015 16:52

23 minə yaxın şagirdin iştirak etdiyi imtahanda davamiyyət 90 % təşkil edib. Onu da bildirək ki, həmin bölgələr üzrə ötən dərs ilində buraxılış imtahanında qeyri-kafi qiymət alan, müəyyən səbəblərdən orta təhsil kursunu bitirməyən şəxslər də imtahan veriblər. Qeyd edək ki, imtahanların nəticələri iyunun 4-də məlum olacaq. İmtahanların növbəti mərhələsi iyunun 8-də Gəncə, Mingəçevir və Naftalan şəhərləri, Ağdam, Ağstafa, Bərdə, Daşkəsən, Füzuli, Gədəbəy, Goranboy, Göygöl, Qazax, Samux, Şəmkir, Tərtər, Tovuz və Yevlax rayonlarında keçiriləcək.

08/07/2015 16:52

Qeyd edək ki, bu müsabiqə Azərbaycan Respublikası Təhsil Nazirliyinin, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun və Azərbaycan Mətbuat Şurasının birgə təşkilatçılığı ilə keçirilib. Tədbir iştirakçılarını salamlayan təhsil naziri Misir Mərdanov Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu və Azərbaycan Mətbuat Şurası ilə birgə əməkdaşlıqdan söz açıb, ilk dəfə keçirilən bu müsabiqəyə 45 yazının təqdim olunduğunu diqqətə çatdırıb. Nazir bildirib ki, əsas məqsədi Azərbaycan təhsilində gedən proseslərin geniş ictimaiyyətə daha yaxından çatdırılmasında peşəkar jurnalist yaradıcılığını stimullaşdırmaq, təhsil sahəsindən yazan ixtisaslaşmış jurnalistlər qrupunun formalaşmasına dəstək göstərmək, kütləvi informasiya vasitələrinin təhsil orqanları ilə səmərəli əməkdaşlıq prinsiplərini təbliğ etmək, təhsil mövzusunun mediada geniş şəkildə işıqlandırılmasına şərait yaratmaqdan ibarət olan müsabiqəyə sənəd qəbulu iyunun 10-dan iyulun 1-dək davam edib. Təhsillə bağlı 15 mövzu üzrə keçirilmiş müsabiqəyə təqdim olunmuş yazıların təcrübəli ekspertlər tərəfindən qiymətləndirildiyini söyləyən Misir Mərdanov 1 nəfərin I yerə, 2 nəfərin II yerə, 3 nəfərin III yerə, 10 nəfərin isə həvəsləndirici yerə layiq görüldüyünü qeyd edib. Müsabiqənin qalibi olan 16 jurnalistin Azərbaycan Respublikası Təhsil Nazirliyinin, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun, Azərbaycan Mətbuat Şurasının xüsusi diplomuna layiq görüldüyünü və onlar üçün pul mükafatının nəzərdə tutulduğunu vurğulayan nazir bu müsabiqənin uğurla başa çatdırılmasında köməyi keçən hər kəsə təşəkkürünü bildirib. Azərbaycan Milli Mətbuatının 135 illiyi münasibətilə Təhsil Nazirliyinin təşəbbüsü ilə keçirilən müsabiqəyə qatılmış jurnalistlərin tutduqları yerlərdən asılı olmayaraq, hər birinin qalib olduğunu nəzərə çatdıran Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli və Azərbaycan Mətbuat Şurasının sədri Əflatun Amaşov belə tədbirlərin gələcəkdə də keçiriləcəyinə ümidvar olduqlarını bildirib, media nümayəndələrini təbrik ediblər. Sonra müsabiqədə qalib gəlmiş jurnalistlərə diplomlar və pul mükafatları təqdim edilib, onlara yeni-yeni yaradıcılıq uğurları arzu olunub.

08/07/2015 16:52

İyulun 7-də “Təhsil” Nəşriyyat-Poliqrafiya müəssisəsinin “Kitab evi”nin açılış mərasimi keçirilib. Açılış mərasimində təhsil naziri Misir Mərdanov, mədəniyyət və turizm naziri Əbülfəs Qarayev, millət vəkilləri Bəxtiyar Əliyev, Nizami Cəfərov, Azərbaycan Jurnalistlər Birliyinin sədri Elçin Şıxlı, “525-ci qəzet”in baş redaktoru Rəşad Məcid, şair Çingiz Əlioğlu və digər tanınmış ziyalılar iştirak ediblər. Öncə təhsil naziri Misir Mərdanov, mədəniyyət və turizm naziri Əbülfəs Qarayev “Kitab evi”nin rəmzi açılışını bildirən qırmızı lenti kəsib, açılış münasibətilə hamını təbrik ediblər. “Təhsil” Nəşriyyat-Poliqrafiya müəssisəsinin baş direktoru Bəhruz Axundov mərasim iştirakçılarına rəhbərlik etdiyi müəssisə və “Kitab evi” haqqında məlumat verib. B.Axundov daha sonra bildirib ki, çoxsaylı peşəkar kollektivə, ən müasir poliqrafiya texnologiyasına malik olan “Təhsil” Nəşriyyat-Poliqrafiya müəssisəsi yeni standartlara və müasir kitab ticarəti normalarına cavab verən öz kitab yayım mərkəzini – “Kitab evi”ni təsis edib. “Kitab evi”ndə 1000-dən artıq adda müxtəlif nəşr nümunələrinin toplandığını söyləyən baş direktor burada, həmçinin, lazımi kitabı asanlıqla seçməkdə alıcıya kömək edəcək elektron kartoteka mərkəzinin fəaliyyət göstərdiyini bildirib. Qeyd edib ki, alıcı kataloq vasitəsilə istənilən kitab barədə məlumat ala bilər. O da bildirilib ki, istənilən şəxs “Kitab evi”ndə ölkəmizdə, eləcə də xaricdə nəşr olunmuş hüquq, uşaq ədəbiyyatı, bədii publisistik, elmi-kütləvi, ictimai-siyasi ədəbiyyat, dərslik və dərs vəsaiti, lüğət və ensiklopediyalar, həmçinin, dəftərxana və məktəb ləvazimatlarını əldə etmək imkanına malik olacaqdır. Sonra təhsil naziri Misir Mərdanov və digər qonaqlar yeni açılmış “Kitab evi” ilə yaxından tanış olublar.

08/07/2015 16:52

Öncə qonaqları səmimi salamlayan nazir Azərbaycanla Bolqarıstan arasında mövcud olan ikitərəfli əlaqələrdən söz açıb. Milli və Dünya İqtisadiyyatı Universitetinin rektoru Borislav Borisov öz ölkəsinin təhsil sistemi, onun strukturu  və rəhbərlik etdiyi təhsil müəssisəsi barədə geniş məlumat verib. Qonaq həmçinin Bolqarıstandan kənarda təhsil alan gənclər, orta məktəblərin mövcud vəziyyəti və ümumilikdə təhsil sahəsi üzrə görülən işlərdən də bəhs edib. Nazir də öz növbəsində ölkəmizin ali və orta təhsil sistemi, aparılan islahatlar, dərsliklərlə təminat, yeni tikilən məktəblər haqqında danışıb, müvafiq statistikanı qonağın diqqətinə çatdırıb. Görüşdə iki ölkə arasında təhsil sahəsində qarşılıqlı əlaqələrin qurulması, müəllim və tələbə mübadiləsinin aparılması, birgə elmi konfransların keçirilməsi, eləcə də digər məsələlər müzakirə edilib.

08/07/2015 16:52

        Öncə nazir ölkə Prezidenti cənab İlham Əliyevin “2009-2013-cü illərdə Azərbaycan Respublikasının ali təhsil sistemində islahatlar üzrə Dövlət Proqramı”nın təsdiq edilməsi barədə Sərəncam imzaladığını və bu sənədin xüsusi əhəmiyyət daşıdığını bildirib. Misir Mərdanov qeyd olunan proqramda nəzərdə tutulan məsələlər, ali təhsil sahəsi üzrə görüləcək işlər haqqında media nümayəndələrinə ətraflı məlumat verib. Mətbuat konfransında 2008-2009-cu tədris ilinin yekunlarından söz açan nazir orta ümumtəhsil məktəblərində mərkəzləşdirilmiş buraxılış imtahanlarının keçirilməsi, yeni məktəb və əlavə korpusların tikintisi, ölkəmizdə fəaliyyət göstərən dövlət və özəl ali təhsil müəssisələri, burada təhsil alan tələbələrin sayı və digər mühüm istiqamətlər üzrə ümumi statistikanı iştirakçıların diqqətinə çatdırıb. Sonda təhsil naziri Misir Mərdanov media nümayəndələrinin suallarını cavablandırıb.

08/07/2015 16:52

Yay məktəbində Təhsil Nazirliyinin Strateji təhlil, planlaşdırma və kadrların idarəolunması şöbəsinin aparıcı məsləhətçiləri Vüqar Əbdülrəhimov, Natiq Əliyev, Müasir Təhsil və Tədrisə Yardım Mərkəzinin təhsil siyasəti üzrə proqram direktoru Elmina Kazımzadə, həmin mərkəzin ali təhsil üzrə proqram meneceri Raziyə İsayeva, Kurikulum Mərkəzinin böyük elmi işçisi Fəridə Hüseynova və Bakı şəhərindəki 193 nömrəli orta məktəbin ingilis dili müəllimi Təranə Böyükzadə iştirak edib. Məktəbin təşkilində əsas məqsəd təhsildə liderlik təcrübəsini öyrənmək, məktəb direktorlarının idarəetmə sahəsində peşəkarlıq səviyyəsini yüksəltmək, idarəetmənin təkmilləşdirilməsi istiqamətində müvafiq bilikləri əldə etmək, çevik və müasir idarəetmə bacarıqlarına yiyələnmək olub. Yay məktəbində ölkəmizi təmsil edən nümayəndələrdən Elmina Kazımzadə, ABŞ-dakı Cənubi Konnektikut Dövlət Universitetinin professorları Ketrin Maqno, Listra Riçardson və ABŞ-dakı Viskonsin Universitetinin professoru Maykl Applın “Liderlər yeniliklərin təbliğatçısı kimi”, “Yeni əsr üçün yeni yanaşmalar”, “Tədqiqat liderliyin mühüm istiqaməti kimi” mövzuları üzrə məruzə və təqdimatları dinlənilib. Qeyd olunan mövzular ətrafında fikir mübadiləsi aparılıb, eyni zamanda, ayrı-ayrı qruplarda praktiki işlər həyata keçirilib. Sonda ölkəmizi təmsil edən iştirakçılara Təhsil Siyasəti üzrə Şəbəkələr Mərkəzi tərəfindən sertifikatlar təqdim edilib.

08/07/2015 16:52

Müşavirəni giriş sözü ilə açan təhsil naziri Misir Mərdanov mərkəzləşdirilmiş buraxılış imtahanlarının ölkəmizin müxtəlif bölgələri üzrə keçirilmə vaxtı, bu istiqamətdə aparılan hazırlıq barədə iştirakçılara məlumat verib. Qeyd olunan sahə üzrə aparılan işlərə ciddi yanaşmağın vacibliyini diqqətə çatdıran nazir eyni zamanda imtahan rəhbəri təyin olunan şəxslərə öz tövsiyələrini verib. Sonra Misir Mərdanov PİSA-2009, beynəlxalq, milli və məktəbdaxili qiymətləndirmə proqramları üzrə həyata keçirilən tədbirlərdən də söz açıb. Müşavirədə mərkəzləşdirilmiş buraxılış imtahanlarının keçirilməsinə dair bir sıra məsələlərə də toxunulub.

08/07/2015 16:52