Rusiya Federasiyasının Saxa Respublikasının Yakutsk şəhərində “Asiyanın uşaqları” altıncı beynəlxalq idman oyunları başa çatıb. Oyunların proqramına daxil olan  sərbəst güləş üzrə kadetlər arasında  yarışlarda “Təhsil” Respublika İdman Mərkəzinin 1 saylı Respublika İxtisaslaşdrılmış Olimpiya Ehtiyatları Uşaq-Gənclər İdman Məktəbinin yetirməsi  Vahid  Əlizadə  2001-ci il təvəllüdlülər arasında  63 kq çəki dərəcəsində I yerə layiq görülüb. Qeyd edək ki, 1996-cı ildən keçirilən yarışlarda, Azərbaycanla yanaşı Asiya qitəsindən 38 ölkənin təmsilçiləri basketbol, boks, taekvando, sərbəst güləş, cüdo, yüngül atletika, stolüstü tennis, üzgüçülük və s. idman növlərində medallar uğrunda mübarizə aparırlar.

14/07/2016 15:26

İyulun 13-də “Azərbaycan üçün öyrət” təhsil proqramı çərçivəsində yay məktəbinə start verilib. Tədbirdə təhsil nazirinin müavini Firudin Qurbanov, “Kapital Bank”ın əməkdaşları, millət vəkilləri, layihənin tərəfdaş qurumlarının nümayəndələri, KİV təmsilçiləri iştirak ediblər. Təhsil nazirinin müavini Firudin Qurbanov bildirib ki, proqramın məqsədi korporativ sosial məsuliyyət çərçivəsində təhsilin keyfiyyətinin yüksəldilməsində ictimaiyyətin iştirakına imkan yaradılması, əlavə təhsil imkanları ilə şagirdlərin bilik və dünyagörüşünün artırılmasıdır. Millət vəkilləri Hadı Rəcəbli, Vahid Əhmədov layihənin keçirilməsini yüksək qiymətləndirərək iştirakçılara uğurlar arzulayıblar.  “Təhsil avtobusu” yay məktəbi layihəsi Bakı, Lənkəran, Quba, Şəki və Gəncə şəhərlərini əhatə edən təhsil marafonudur. Layihə çərçivəsində tanınmış ictimai şəxslərin iştirakı ilə ölkənin 5 bölgəsində akademik göstəriciləri zəif olan məktəblərin şagirdləri üçün hər biri 2 gün olmaqla yay məktəbi təşkil olunacaq. İyulun 21-dək davam edəcək layihə müddətində şagirdlər intellektual yarışlarda və fərdi inkişaf təlimlərində iştirak edəcək. Layihə Təhsil Nazirliyi, Kapital Bankın tərəfdaşlığı, “İstək” liseyi, “Şərq-Qərb” Nəşriyyat Evi, STEM təhsil mərkəzi, GR8 Şəxsi İnkişaf Proqramı, Azərbaycan İntellektual Klublar Assosiyasiyası, “YouthInc.” Gənclərin Sahibkarlıq Proqramı, SABAH qrupları, “Bir” Tələbə-könüllü proqramının dəstəyi ilə həyata keçirilir. Layihənin rəsmi informasiya dəstəkçiləri Təhsil TV və Region TV-dir. "Azərbaycan üçün öyrət" layihəsi ümumtəhsil məktəblərində keyfiyyətli təhsil üçün bərabər imkanların yaradılmasını təmin edən təhsil platformasıdır. Proqramın məqsədi korporativ sosial məsuliyyət çərçivəsində təhsilin keyfiyyətinin yüksəldilməsində ictimaiyyətin iştirakına imkan yaradılması, əlavə təhsil imkanları ilə şagirdlərin bilik və dünyagörüşünün artırılmasıdır.

13/07/2016 15:42

İyulun 6-dan 8-dək Gəncə şəhərində “Ceyranların Qafqazda tarixən məskunlaşdıqları ərazilərə qaytarılması” proqramı çərçivəsində “Ceyranları qoruyaq!” adlı ekoloji yay düşərgəsi təşkil olunub. IDEA İctimai Birliyi, Ümumdünya Təbiəti Mühafizə Fondunun (WWF) Azərbaycan nümayəndəliyi və Azərbaycan Respublikası Təhsil Nazirliyi Respublika Ekoloji Tərbiyə və Təcrübəçilik Mərkəzinin birgə əməkdaşlığı ilə təşkil edilən düşərgədə Şəki, Goranboy, Qax və  Samux rayonlarından 30 şagird iştirak edib. Düşərgənin təşkil olunmasının əsas məqsədi ceyranların reintroduksiya edildiyi ərazilərdə yaşayan gənc nəsli bu növ barədə maarifləndirməkdir. Düşərgədə Təhsil Nazirliyi Respublika Ekoloji Tərbiyə və Təcrübəçilik Mərkəzinin əməkdaşları tərəfindən hazırlanmış ekoloji maarifləndirmə proqramı üzrə seminar və müzakirələr təşkil edilib. Məktəblilərə ceyranların Azərbaycanda məskunlaşdığı tarixi ərazilər, bu növün həyat tərzi, təbiətdə rolu, tükənməsi səbəbləri, reintroduksiyası və qorunması haqqında ətraflı məlumat verilib. Hacıkəndə və Göygöl Milli Parkına təşkil edilən ekskursiyalar zamanı düşərgə iştirakçıları praktik məşğələlərdə təbiətdə ekosistem əlaqələrini  və biomüxtəlifliyi öyrənmək məqsədilə ekoloji tədqiqatlar aparıb, meşədə təhlükəsizlik qaydalarına riayət edərək istiqaməti və müxtəlif heyvanların izlərini təyin edib, ceyranların həyat tərzi haqqında videofilmlərlə tanış olublar. “Qafqazın böyük beşliyi: ceyran – təbiətin bəzəyidir” mövzusunda aparılan  müzakirələrdə iştirak edən şagirdlər əhalinin müxtəlif sosial qruplarının təbii sərvətlərə münasibətindən danışıblar. Sonda düşərgə iştirakçılarına və fəal məktəblilərə təşkilatçılar tərəfindən diplom və hədiyyələr təqdim olunub.

12/07/2016 10:50

Balakən, Qax, Zaqatala, Qəbələ, Oğuz və Şəki rayon sakinlərinin nəzərinə! Təhsil naziri Mikayıl Cabbarov 19 iyul 2016-cı il tarixində saat 11:00-da Qax şəhərindəki Heydər Əliyev Mərkəzində mərkəzi icra hakimiyyəti orqanları rəhbərlərinin 2016-cı ilin iyul ayında şəhər və rayonlarda vətəndaşların qəbulu cədvəlinə uyğun olaraq, Balakən, Qax, Zaqatala, Qəbələ, Oğuz və Şəki rayon sakinlərini qəbul edəcək. Qəbulda Balakən, Qax, Zaqatala, Qəbələ, Oğuz və Şəki rayonlarında müvəqqəti məskunlaşmış məcburi köçkünlər də iştirak edə bilərlər. Qəbula gəlmək istəyən vətəndaşlar 11, 12, 13, 14, 15 iyul 2016-cı il tarixlərində Təhsil Nazirliyinin Telefon Məlumat Mərkəzinin 146 nömrəli telefonuna (“Qaynar xətt” xidməti) və ya http://edu.gov.az/az/contacts/request elektron poçt ünvanına müraciət edərək qeydiyyatdan keçə bilərlər. Qeydiyyatdan keçmiş vətəndaşlardan xahiş olunur ki, qəbula gələrkən aidiyyəti məsələləri dolğun ifadə edən ərizə ilə müraciət etsinlər.

11/07/2016 11:47

“Dünya  uşaqların  gözü  ilə” proqramı çərçivəsində “Sərhədsiz  diplomatiya” (“World Wide Diplomacy“) uşaq  diplomatiyası  layihəsinin  iştirakçıları Yaponiyada səfərdə olublar.  Səfərdə Bakı Avropa Liseyinin  şagirdləri  Cahangir Məmmədli, Səidə  Tağızadə  və Səmilə Tağızadə  iştirak edib. Yaponiyanın “Tokio-Sinema”  kinokampaniyasının dəstəyi ilə təşkil edilən səfərin  məqsədi  məktəbliləri bu ölkənin mədəniyyəti adət-ənənələri ilə tanış etmək, WWD- nin  iştirakçıları ilə birlikdə film hazırlamaq olub. Səfər çərçivəsində layihə  iştirakçıları öz həmyaşıdları ilə ünsiyyət  yaradaraq   bir-birlərinin həyat  tərzini  müzakirə edib,fərqli mədəniyyətlər, adət-ənənələrlə tanış olublar. Gənc diplomatlar BMT-nin  Tokiodakı  Universitetində, eləcə də bir sıra ictimai təşkilatlarda keçirilən görüşlərdə iştirak ediblər. Qeyd edək ki, “ADA” Universitetinin tərəfdaşlığı ilə Bakı  Avropa  Liseyində həyata keçirilən beynəlxalq layihənin əsas məqsədi gənc nəslin dünyada gedən qlobal proseslərə münasibət bildirməsini, beynəlxalq ictimaiyyəti maarifləndirməsini təmin etmək, yeniyetmələrin virtual  kommunikasiya bacarıqlarını artırmaqdan ibarətdir.  Müəllim, psixoloq və valideynlərin iştirakı ilə təşkil edilən uşaq diplomatiyası layihəsi məktəblilərin öz yaşıdları, eləcə müxtəlif ölkələrin və mədəniyyətlərin nümayəndələri ilə vizual ünsiyyətə əsaslanır. Layihə virtual (dialoqlar, onlayn konfrans) şəbəkə şəklindədir.

08/07/2016 18:15

Tərtər Rayon Mədəniyyət Mərkəzində Tərtər,Ağdam, Ağcabədi, Laçın, Füzuli, Xocavənd rayonlarının təhsil işçiləri ilə görüş keçirilib. Görüşdə təhsil nazirinin müavini Firudin Qurbanov,Nazirliyin məsul əməkdaşları, Tərtər Rayon İcra Hakimiyyətinin başçısı  Müstəqim Məmmədov, Tərtər, Ağdam, Ağcabədi, Laçın, Füzuli, Xocavənd rayonlarının təhsil şöbələrinin müdirləri və əməkdaşları, ümumtəhsil və məktəbdənkənar təhsil müəssisələrinin direktorları və müəllimlər iştirak edib. Görüşün məqsədi bölgələrdə çalışan təhsil işçiləri ilə sıx əlaqə yaratmaq, onların təklif, rəy və təşəbbüslərindən təhsil sahəsində həyata keçirilən islahatlar prosesində istifadə etmək, təhsil müəssisələrində tərbiyə işinin mövcud vəziyyəti və onun gücləndirilməsinin əsas istiqamətləri barədə tövsiyələr vermək olub. Tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad edib. Daha sonra Mədəniyyət Mərkəzinin foyesində rayon məktəblilərinin əl işlərini və idman sahəsində qazandığı uğurları əks etdirən sərgi ilə tanış olublar. Tədbiri giriş sözü ilə açan Tərtər rayon İcra Hakimiyyətinin başçısı Müstəqim Məmmədov  son illər rayonda təhsil sahəsində əldə edilən uğurlardan danışıb. Görüşdə çıxış edən təhsil nazirinin müavini Firudin Qurbanov milli təhsil quruculuğu sahəsində əldə olunan nailiyyətlərdən, “Azərbaycan Respublikasında təhsilin inkişafı üzrə Dövlət Strategiyası”nın həyata keçirilməsi ilə bağlı görülən işlərdən, Təhsil Nazirliyinin keçirdiyi islahatlardan danışıb. Nazir müavini təhsil sistemində tədrislə yanaşı, əsas diqqətin təlim-tərbiyə məsələlərinə, müəllim-sagird münasibətlərinə yönəldiyini və bu işlərin yerinə yetirilməsində müəllimlərin üzərinə böyük vəzifələr düşdüyünü qeyd edib. Firudin Qurbanov təhsil sahəsində tərbiyənin inkişaf istiqamətləri, məktəbdənkənar fəailiyyətin təşkili, təkmilləşdirilməsi, xüsusi ilə vətənpərvərlik tərbiyəsinin rolu və sağlam həyat tərzi ilə bağlı nazirliyin həyata keçirdiyi layihələri haqqında məlumat verib. Tədbirdə müvafiq rayonların təhsil işçiləri çıxış edərək təlim və tərbiyə sahəsində görülmüş işlər haqqında məlumat verib, mövcud problemlərin həlli ilə bağlı təkliflərini bildiriblər. Sonda təhsil işçilərinin fikirləri dinlənilib və onları maraqlandıran suallar cavablandırılıb. Daha sonra Təhsil Nazirliyinin məsul işçiləri və Tərtər rayon İcra Hakimiyyətinin nümayəndələri Tərtər rayonunda yeni tikilən şahmat məktəbinə, Ermənistan silahlı qüvvələri tərəfindən atəşə tutulan məktəblərə, məktəbdənkənar təhsil müəssisələrinə baxış keçirib, mövcud vəziyyətlə, problemlərlə yerində tanış olublar.

08/07/2016 13:18

Qəbələ şəhərində Fövqəladə Hallar Nazirliyinin təşkilatçılığı, Təhsil Nazirliyinin, Gənclər və İdman Nazirliyinin, UNİCEF-in Bakı ofisinin dəstəyi ilə keçirilən "Gənc xilasedici" IV Beynəlxalq yarışına və "Gənc xilasedici və yanğınsöndürən" V Ümumrespublika birinciliyinə yekun vurulub. Yarışın keçirilməsində əsas məqsəd  yeniyetmə və gənclərin fövqəladə hallara hazırlıq səviyyəsinin yüksəldilməsi, məktəblilərə şəxsi və ictimai təhlükəsizliyə məsuliyyətli yanaşma hissinin, gənc nəslə hərbi-vətənpərvərlik ruhunun aşılanması, məktəblilər arasında sağlam həyat tərzinin təbliğindən ibarətdir. Tədbirdə fövqəladə hallar naziri Kəmaləddin Heydərov, təhsil nazirinin müavini Firidun Qurbanov,  gənclər və idman nazirinin müavini İsmayıl İsmayılov iştirak ediblər. İlk olaraq gənc xilasedicilərin nümunəvi təlim çıxışları nümayiş etdirilib. Daha sonra tədbirdə çıxış edən rəsmilər keçirilən yarışların gənclərin fövqəladə hallara qarşı mübarizədə təcrübə qazanmalarına geniş imkanlar açacağını diqqətə çatdıraraq belə tədbirlərin davam etdirilməsinin vacibliyini vurğulayıblar. Beynəlxalq yarışda birinci yeri  Azərbaycan, ikinci yeri Gürcüstan, üçüncü yeri isə Rusiya komandaları tutublar. Ümumrespublika birinciliyində isə birinci yerə Bakı şəhəri 220 nömrəli tam orta  məktəbi, ikinci yerə Yardımlı, üçüncü yerə İsmayıllı rayonunun komandaları layiq görülüblər. Qalib komandalar fəxri fərman və qiymətli hədiyyələrlə təltif olunub. Tədbirdə yarışlar haqqında videoçarx nümayiş etdirilib, bədii hissə təqdim olunub. Qeyd edək ki, “Gənc xilasedici və yanğınsöndürən” respublika və “Gənc xilasedici” beynəlxalq yarışları Azərbaycan Respublikasının Təhsil, Fövqəladə Hallar, Gənclər və İdman nazirliklərinin birgə qərarına əsasən, 2011-ci ildən başlayaraq ümumtəhsil məktəblərinin şagirdləri arasında keçirilir.

05/07/2016 16:36

Rumıniyanın paytaxtı Buxarest şəhərində güləş idman növü üzrə gənclər arasında Avropa çempionatı keçirilib. Çempionata “Təhsil” Respublika İdman Mərkəzinin Gəncə filialından 2 güləşçi qatılıb. 74 kq çəkidə mübarizə aparan Murad Süleymanov ilk olaraq Yunanıstan təmsilçisinə vaxtından əvvəl qalib gəlib. Ardınca Gürcüstan və Polşa idmançılarını mübarizədən kənarlaşdıran Murad yarımfinalda Litva təmsilçisini məğlub edərək finala yüksəlib. Həlledici görüşdə güləşçimiz Rusiya təmsilçisinə də qalib gələrək Avropa çempionatının qızıl medalına yiyələnib.

05/07/2016 10:21

Yunanıstan Respublikasının Xalkidiki şəhərində məktəblilər arasında keçirilən şahmat üzrə Avropa birinciliyi başa çatıb. Yarışda Avropanın 21 ölkəsinin komandası iştirak edib və ölkəmizi birincilikdə 16 şahmatçı təmsil edib.  Maraqlı mübarizə şəraitində keçən birincilikdə “Təhsil” RİM-in Respublika İxtisaslaşdırılmış Olimpiya Ehtiyatları Uşaq-Gənclər Şahmat Məktəbinin yetirməsi Ziya Məmmədov 7 yaşadək oğlanlar arasında I yer, Aydın Süleymanlı 11 yaşadək oğlanlar arasında II yer, Quba Uşaq-Gənclər Şahmat Məktəbinin yetirməsi Fərid Məlikov 13 yaşadək oğlanlar arasında III yer, Sumqayıt Uşaq-Gənclər Şahmat Məktəbinin yetirməsi Səbinə Rzalı 13 yaşadək qızlar arasında II yer, Ucar Uşaq-Gənclər Şahmat Məktəbinin yetirməsi Süsən Məmmədova isə 15 yaşadək qızlar arasında III yeri tutublar. Komandamız ümumilikdə Avropa birinciliyində komanda hesabında III yerə layiq görülüb.

05/07/2016 09:53

Dövlət İmtahan Mərkəzinin Azərbaycan Respublikası Təhsil Nazirliyinə təqdim etdiyi məlumata əsasən ölkə üzrə IX və XI siniflərin buraxılış imtahanlarının ilkin nəticələri məlum olub.  IX siniflər üzrə imtahanlarda 104476 nəfər məzun iştirak edib. Məzunların 70262 nəfəri və ya 67,3 faizi bütün fənlərdən müsbət qiymət alıb. Bu göstərici ötən ilki göstəricidən 2,7 faiz daha yaxşıdır. XI siniflər üzrə imtahanlarda 84589 nəfər məzun iştirak edib. Bu məzunların 54704 nəfəri və ya 64,7 faizi bütün fənlərdən müsbət qiymət alıb. XI sinif buraxılış imtahanları üzrə ötən ilki nəticələrlə müqayisədə əsaslı dəyişiklik qeydə alınmamışdır. Qeyd edək ki, ötən il buraxılış imtahanlarına xarici dil (və ya kimya) fənni üzrə kafi qiymət almaq üçün 6 suala doğru cavab verilməsi tələb olunurdusa, cari ildə bu tələb 7 doğru cavaba qədər artırılmışdır. IX sinif imtahanlarının nəticələri son 4 ildə davamlı olaraq yaxşılaşmaqdadır. Bütün fənlərdən müsbət qiymət alan məzunların faiz göstəricisi 2012-ci il ildə 50,3 idisə, 2016-cı ildə bu göstərici 67,3 faizə qədər yüksəlib. IX sinif buraxılış imtahanlarının nəticələrinin illər üzrə dinamikası aşağıdakı qrafikdə göstərilib. Azərbaycan Respublikasının təhsil nazirinin “Ümumi təhsil üzrə inkişafyönlü tədbirlər haqqında” əmrinə əsasən 2015-2016-cı tədris ilində Ağcabədi, Astara, Cəlilabad, Masallı, Saatlı və Sabirabad rayonlarında inkişafyönlü tədbirlər həyata keçirilib. Sevindirici haldır ki, bu rayonlar üzrə məzunların nəticələri əsaslı şəkildə yaxşılaşıb. Ötən il ilə müqayisədə hər iki fənn üzrə müsbət qiymət alanların sayında Astara rayonu üzrə 22 faiz, Ağcabədi rayonu üzrə 15 faiz, Sabirabad rayonu üzrə 14 faiz, Masallı rayonu üzrə 11 faiz, Cəlilabad və Saatlı rayonlarının hər biri üzrə 9 faiz artım müşahidə edilib. Bununla yanaşı, digər bölgələrdə də IX sinif məzunlarının nəticələri yaxşılaşıb. Belə ki, Şəmkirdə 13 faiz, Gədəbəydə 10 faiz,  Lerikdə 9 faiz, Salyanda 8 faiz, Hacıqabul, Beyləqan, İmişli, Zaqatala, və Qobustan rayonlarının hər biri üzrə 7 faiz müsbət dinamika qeydə alınıb.  Buraxılış imtahanlarında Təhsil Nazirliyinin birbaşa tabeliyində olan liseylər, özəl təhsil müəssisələri və hərbi liseylərin, həmçinin Bakı, Gəncə, Naxçıvan, Sumqayıt, Mingəçevir şəhərlərinin, o cümlədən Abşeron, Qax, Oğuz, Qubadlı, Xızı, Şahbuz, Şərur rayonlarının ümumi təhsil məktəblərinin göstəriciləri yüksək olub. Buraxılış imtahanlarının nəticələri hər il olduğu kimi, müxtəlif parametrlər üzrə təhlil ediləcək və nəticələr ictimaiyyətə çatdırılacaqdır. 

04/07/2016 14:29